【台南ê囡仔誠gâu,台北ê囡仔佇佗?】

09/16/2026


【台南ê囡仔誠gâu,台北ê囡仔佇佗?】


對囡仔講台語這幾年來,

看著袂少台南人ê gâu人,

我來看阮這沿--ê台南人,

有講台語ê生活環境;

閣有學台文ê決心;

毋但按呢看產地ê時陣,

發現閣有真濟物件是台南製造--ê。

雖然各縣市攏有講台語ê 人,

台南對我來講,是帝都,

是一ê有神奇力量ê所在。


我是一ê正港ê台北囡仔呢!

輸人毋輸陣啊!阮嘛愛骨力傳承啊!

猶毋過,阮定拄著一寡聲音,

「台北無人講台語啦!」

「囡仔聽無啦!」

「台北人就是袂曉投票啦!」

(這⋯有可能是真正--ê?😂)


只要想著阿爸、阿母、

阿公、阿媽、阿祖攏是講台語--ê,

我就感覺實在無啥物好懷疑--ê,

台語是重要ê語言,學外國語,

嘛愛講台灣話。


之前,朋友來附近演講,

我邀請伊ê囡仔佮紅肉

鬥陣去教會主日學,

紅肉足歡喜ê,

伊毋敢相信問我講:

「你意思是講有囡仔會當佇咧教會佮我講台語?」

「我去教會到今6、7年來毋捌有這種好空ê代誌」

伊講教會囡仔攏講中語,

真濟老師雖然會曉台語,

煞攏貧惰講台語。


最近阿比嘛正式開始參加幼幼班,

本來兩歲就好去參加矣,

但我一直拖到今,

主要原因是阿比是全台語ê囡仔,

我希望台語先顧予在,

才來面對強勢中語ê現實;

真奇怪,對一寡人來講,

干焦會曉講台語ê囡仔予人壓力、

予人看做是需要調整--ê代誌;

甚至佇咧阮提出

敢會當予囡仔閣加一寡機會認捌接觸台語ê時陣,

得到「台語主日學市場真細」、「老師無法度」、

「重視台語ê家庭厝內就會教矣」、

「教會是信仰第一,語言第二」,

這幾年來,

我看著主日學賰主禱文、

奉獻歌是台語,

有當陣唸一寡金句是台語,

就無矣,

台語已經無咧生活中,

變做一種予序大人感覺親切、

予阿公阿媽一半擺仔歡喜一下ê表演語言矣。


我ê感受是,這馬佇咧台北生活,

你會當學任何語言、使用任何語言,

但若袂曉中語、中文就會真不便,

規ê社會用制度共你教示!


雖然現實殘酷,

一直批評、一直埋怨代誌嘛袂變好,

我看著ê台北,因為危機感誠深,

願意出錢出力拍拚ê人誠濟,

敢是按呢?

你敢是台北--ê?

恁阿公阿媽ê生活語言是啥物?



#aIôngtsuèTshīTiúnn

#台北囡仔 #主日學 #長老教會

#台語主日學 #講台語ê囡仔無tè去



Share