【宜蘭Lô-má-jī趣味營】大漢囡仔tsín厲害Day1

【宜蘭Lô-má-jī趣味營】大漢囡仔tsín厲害Day1

2026/7月27日(一) ～ 7月29日(三)

宜蘭台語親子共學團

佇咧 台灣基督長老教會 四結教會舉辦

三工以羅馬字為主題ê夏令營。

#顏建宏 傳道夫婦佮主辦單位熱心接待，

將來參加ê囡仔分做

3-5歲細漢親子組，

是足gâu講囡仔古ê #噹噹噹老師 來𤆬。

7-10歲大漢囡仔組，就由 #頭家 親身出馬，

一人服務，全家出動，活動前一暗就來蹛宜蘭。

為著揣講師，問著我ê時陣已經是第七ê人矣，

歇熱逐家攏足無閒--ê，雖然路頭遠，

辦咧教會，我感覺我一定愛答應。

雖然我設計、發行袂少佮台文有關係ê物件，

但是對團體ê教學經驗suah真少，

比起「教」啥物物件，我較sîng來分享，

陪逐家鬥陣耍。

阮大漢囡仔組算是我有把握ê人數，

內容會當完全講台語，

對我講華語ê囡仔，我會閣替in翻譯一擺，

因為我無愛予人恥笑，嘛無愛恥笑囡仔。

囡仔恁敢知影，你足幸福ê呢！

若是我細漢ê時陣，

教會嘛有這款趣味ê夏令營就好矣！🥹

———

活動佇咧祈禱了後開始。

頭起先用阮偏泉ê特色設計母音節奏🎵

建立儀式感，每一場開場攏餾一擺母音。

自我介紹了後，將大張字母卡分予所有ê人，

用節奏來唸 #大教材 ，予逐家佮手頭牌卡鬥對，

透過按呢了解囡仔ê台語佮台羅程度，

因為所有ê人攏需要唸出來，攏算有輸入。

———

在場大部份攏是宜蘭囡仔，

其中有一位對 #宜蘭腔 真熟手，

但是伊日常對話無定將腔提出來，

予人感受這ê腔口是恬恬踮佇咧伊性命中間ê力量。



聽唱宜蘭腔ê #秀才秀才騎馬弄弄來，

用泡棉棍仔做馬鞭，這是需要一寡想像力，

用歌仔戲ê形式騎馬走圓箍仔，

雖然騎甲不答不七，嘛唱甲離離落落🤣，

逐家相掠攏耍佮笑咍咍。

將馬鞭請轉去了後，

利用囡仔手頭ê大張字母來揣細張字卡，

對in來講真有挑戰性，

頭一ê解出來ê囡仔逐家鬥陣唸伊ê字卡，

其實對會曉講台語ê囡仔來講，

講出喙袂真困難，認字較困難，

「老師我揣無」 像ts 、tsh 無in是一組ê概念；

i 佮l 分袂清楚等等，

攏透過這擺營隊予逐家有機會盡量練習。

———

我佮噹噹噹攏希望是無桌仔ê場所，

因為桌仔就是足煩--ê！🤣🤣🤣

來到宜蘭一定愛講一下在地故事，

《呱呱搶救大西瓜🍉》，

囡仔閣共阮分享田嬰為啥物欲落雨會飛較低。

利用教會邊仔ê草埔，

透過故事內底ê情境，予囡仔一人一粒西瓜球，

抽字母卡唸出「名詞+搶救大西瓜」，

走去摸著樹仔閣轉來抽後一張，

就按呢一直走🤣

23張攏予人抽完了後，算卡片ê時陣，

每一ê人閣唸一擺字母佮名詞，

走上緊提上濟卡片ê人加2點，

其他參加者加一點。

有人無愛參加直接走去就無抾著點。

———

因為細漢班ê點心時間到矣，

西瓜佮磅番麥siunn唌人矣，只好提早歇睏，

但有提早上課，明仔載嘛是袂使貧惰，

mài-khù愛提出來。

教會活動那會當無聖詩，

對《細漢囡仔呵咾天爸》開始，

#曾世詩 老師改編ê 《兩粒饅頭》大受歡迎，

細漢囡仔班實在有夠大聲🤣，

為著對抗閣吸引囡仔，

用變聲mài-khù來予囡仔來唸 #林心智 老師

ê西瓜歌，逐家攏感覺真趣味！🗣️

——

「我ê西瓜」手作時間，

那聽西瓜歌那進行，除了創作家己ê西瓜，

閣需要仿寫羅馬字，無見本，

逐家攏愛家己用頭殼想。

閣來就是換禮物ê時間，點數siōng濟揀2ê，

其他人揀一ê，做助手嘛有禮物，

囡仔閣算真單純，逐家看起來攏耍了有歡喜，

有運動著，有食者，唱歌聽故事，有食閣有掠！

感謝主予阮有機會佮這寡囡仔見面☺️，

明仔載再會。

#培育台語家庭計畫

#活動認列意識培力點數

#頭家教學日記 #宜蘭 #蘭陽平原

#歡迎邀約 #原創有聲台羅教材