【宜蘭Lô-má-jī趣味營】大漢囡仔tsín厲害Day2

【宜蘭Lô-má-jī趣味營】大漢囡仔tsín厲害Day2

2026/7月27日(一) ～ 7月29日(三)

宜蘭台語親子共學團佇咧四結教會舉辦，

三工羅馬字主題ê夏令營。

7-10歲 #大漢囡仔組，就由 #頭家 親身出馬，

一人服務，全家出動，兩工6點鐘，

囡仔到底敢有耍著？請看今仔日ê陪耍日記📓

———

台羅教材耍法百百種，

做講師siōng大ê挑戰毋是教學法等專業知識，

是欲按怎看囡仔ê反應隨時替換調整？

這擺阮為著宜蘭台語共學團，為著四結教會，

#客製化教學 以教會佮台羅為中心來設計。

———

頭一工已經大概了解囡仔ê程度佮個性，

主辦單位調整地點阮佇咧禮拜堂耍，

四結教會真正有夠包容--ê！



我佇咧鋼琴頂懸提一本聖詩佮囡仔說明

啥物是 #漢字 ，啥物是 #羅馬字，

台語有聲嘛有字，

原來阮自細漢佇咧教會就看過台文矣，

煞毋知這就是台文，雖然學員無濟，

但我真正足歡喜佮這陣囡仔分享我食甲

遮濟歲，開足濟氣力才沓沓仔發現ê事實，

in遮爾細漢就有機會聽著。

用 #原創母音節奏唸謠🎵佮祈禱開始。

安排聖詩 #細漢囡仔呵咾天爸，

佮原創讚美歌曲 #aeioo呵咾主 來耍沙鈴。

———



閣來就是令人期待ê #草埔時間！

將23ê字母閣餾一擺，說明規則，

請囡仔將牌卡藏咧3欉樹仔附近，

抽台羅牌卡，用大張牌卡揣細張牌卡，

風真透嘛毋驚牌卡飛去🤣，

抽、揣、傱，閣愛唸出正確字母，

上尾所有ê人鬥陣唸牌卡，

順紲領家己ê牌算分數。

這是今仔日上受歡迎ê單元！

———

小歇睏，轉來室內，

開始兩人一組輪流 #台羅牌卡對戰，

用手摃，用跤踏，每一ê人配一位助理，

閣有兩位裁判，甚至閣有家長鬥做"VAR"🤣，

針對程度、年歲無仝ê囡仔，

請in家己參詳一套雙方攏有辦法接受、

盡量公平ê辦法，

所有ê遊戲攏是人人有獎，

每一項工課攏有人欲自願來做。

——

時間有限，

阮講自昨昏就一直予囡仔搶去講欲看ê

#太陽王蘇巴 （阮改將伊號做《太陽王si-hue》），

紲落來是看台羅將球分類ê 將si-kue 佮si-hue分開，閣有加分ê細粒西瓜球🍉！

「烏白亂」式ê耍法，叫囡仔一定愛走起來！

每一ê單元攏有囡仔講是siōng佮意！👍

siōng尾就是送獎品，

鼓勵in繼續講台語，學台羅，

六點鐘ê活動就到遮結束矣。🔚

——

今仔佮昨昏仝款，講欲唱歌，

就有人一直大聲唱「哈里路亞」；

講欲祈禱，就一直有人大聲唸佛🗣️🤣；

聽節奏傳沙鈴，就有人無愛傳、用擲ê、

抑是刁工傳毋著方向，

人數雖然無濟，各種挑戰煞誠濟，

這寡行為定予遊戲無法度耍甲誠順利，

毋過我選擇莫一直停落來，

活動ê節奏會受影響，

其他想欲好好仔耍ê囡仔顛倒會受影響，

用好耍ê內容佮獎品來唌in！

有囡仔講昨昏提著ê獎品比人較少，

獎品就是欲紮來送你，

你愛加參與內容啊🤣！

結果今仔就耍甲削削叫！

只要內容有趣味，逐家攏耍甲袂記得時間，

耍甲無愛歇睏！

無論年歲抑是程度，逐家攏耍甲笑咍咍，

實在足好--ê！

——

感謝主，這兩工攏足好天，

多謝主辦單位邀請，嘛感謝家長鬥相共；

課程結束了後，家長問我全台走透透，

感覺 #宜蘭囡仔 實力如何？

其實我無走透透😂阮翁專工請假三工，

全家攏𤆬咧身軀邊，

本來想閣加一寡物件，

但集合時間ê前兩分鐘，

我閣咧甲囡仔鬥洗尻川，

雖然無簡單，我真珍惜佮囡仔鬥陣ê時間。

這擺我有感受宜蘭ê力量，

地方文化著愛在地ê人家己拍拚，

家己ê文化家己傳承，家己ê語言家己救，

咱每一ê人，攏咧逐所在，用無仝方式拍拚，

這是咱台灣人攏會使做ê代誌！

#培育台語家庭計畫 #長老教會 #四結教會

#活動認列意識培力點數

#頭家教學日記 #宜蘭 #蘭陽平原

#歡迎邀約 #原創有聲台羅教材

#笑咍咍台語發音玲瑯盒仔