【STEM台語科學營】
【STEM台語科學營】
金爍爍 ê 油水罐仔
2026/09/20(禮拜)
台灣人文煮意麵團 Humanistic Pastafarianism in Taiwan
佇咧樂暢舉辦台語科學營,
一下開始報名,就隨予人搶了了,
吸引 6 歲 - 12 歲 ê 囡仔鬥陣來參加,
起頭兩點鐘,
由頭家共逐家鬥陣耍,
利用 《#笑咍咍台語發音玲瑯盒仔》系列
認捌台羅字母、色水,
鬥陣唱《#看圖學講台灣話》
#算物件ê歌、彩色沙鈴卵、
彩色軟管佮台羅閃卡將台羅字母
餾過一擺閣一擺。
早起 ê 活動設計會當予囡仔獨立參加,
有爸母佇咧身軀邊,
囡仔毋知敢有閣較自在😂?
這擺來參加 ê 囡仔程度攏足好ê!
聽台語完全無問題!
就算有一寡囡仔較講袂出喙,
家長佇咧邊仔一直用心牽教,
實在予人感動,盡量鼓勵囡仔講出喙,
按呢頭家用心維持台語 ê #安心空間
就 tsiânn 有意義!
———
有兩位新莊來 ê 野球男兒,
嘛有「我媽媽是外國人欸」ê a̋i-noo-khoo,
面對無仝程度、無仝年歲ê囡仔,
時間有限 ê 情形下,
盡量調整逐家攏會當接受 ê 困難度佮耍法。
這擺參與活動 ê 囡仔已經是國小、
甚至上大漢已經國中一年仔,
就算逐家攏聽有台語,
但若無意願鬥陣耍嘛是無伊法度😂!
內容猶是 siōng 重要 ê!
講著做實驗,逐家目睭攏金起來矣!
今仔日佮大漢囡仔討論足濟問題,
像金粉是啥物做 ê ?
塑膠微粒是啥物?
對咱ê環境會造成啥物影響?
你敢聽過番麥塑膠(PLA)?
彼是啥?再生纖維閣是啥物?
手油油感覺用水洗是按怎洗袂清氣?
油佮水為啥物分開?
金粉佇咧水內底予你看著啥物?
油性色素佮水性色素有啥無仝?
為啥物油水罐仔摵摵咧會變做一球一球?
大漢囡仔嘛有濟濟問題,
分享水循環、生物鍊 ê 概念,
若是水加油加水敢會當做三層?
水佮油敢會當分別染色?
水內底有微生物,若是按呢,
這馬再生纖維做ê環保金粉囥落去敢會尾仔無去?
阮嘛分享若欲分三層轉去會當按怎耍?
這寡攏是真好 ê 問題呢!
希望囡仔會當繼續保持好奇心!
——
兩點鐘 siú 一聲就過去矣!
大漢值班經理寄阿公去主日學,
細漢 ê 值班經理真配合,
恬恬佇咧外口等,
中央下課傱出去換尿苴仔閣轉來後一節課。
時間 siunn 短,
無時間一直招呼大人,
印象 siōng 深 ê 是有一位學員,
第一節課替我翻譯做英語;
第二節課替我翻譯做中語😂,
阮一直勸伊毋免翻譯,逐家攏聽有。
感謝主辦單位邀請,
拄著遮濟程度遐好 ê 台語囡仔,
佮囡仔鬥陣講台語,耍出彩色人生!🌈
予人足歡喜--ê!❤️
歡迎後擺閣鬥陣來樂暢𨑨迌!
#培育台語家庭計畫
#頭家教學日記 #台北
#樂暢親子共學空間 #油水罐仔
#台灣人文煮意麵團 #台語科學
#歡迎邀約 #原創有聲台羅教材
